Fevralın 4-də Naxçıvan Biznes Mərkəzində muxtar respublika sahibkarları ilə görüş keçirilib.

Naxçıvan Muxtar Respublikası Ali Məclisinin Sədri Vasif Talıbov tədbirdə çıxış edib, ümummilli liderimiz Heydər Əliyevin “Biz sahibkarlığın inkişafına dövlət siyasətimiz kimi baxırıq. Azərbaycanın sosial-iqtisadi inkişafını bilavasitə sahibkarlıqla, onun inkişafı ilə bağlayırıq”,-fikirlərini xatırladaraq deyib: Dahi şəxsiyyət ölkəmizə ikinci rəhbərliyi dövründə sahibkarlığın inkişafını Azərbaycanın strateji yolu kimi müəyyənləşdirib, bu sahədə zəngin qanunvericilik bazası yaradılıb. Bu gün ölkə Prezidenti cənab İlham Əliyevin ulu öndərin yolunu uğurla davam etdirməsi sahibkarlığın inkişafında da yeni mərhələnin əsasını qoyub, Azərbaycanda və onun Naxçıvan Muxtar Respublikasında əlverişli biznes və investisiya mühiti yaradılıb. Bütün bunların nəticəsidir ki, muxtar respublikada sosial-iqtisadi islahatların əhatə dairəsi genişlənib, ərzaq və enerji təhlükəsizliyi təmin edilib, yerli istehsalın həcmi artıb. Digər bir tərəfdən kənd təsərrüfatına dövlət dəstəyi aqrar sahədə sahibkarlığın inkişafına geniş imkanlar açıb. Torpaq mülkiyyətçilərinə və fermerlərə güzəştli kreditlərin və subsidiyaların verilməsi, lizinq xidmətinin təşkili, texnika və avadanlıqlarla təminat özəl mülkiyyətə əsaslanan təsərrüfatların sayını artırıb. Hazırda muxtar respublikada aqrar sahədə məhsul istehsalının 100 faizə yaxını özəl mülkiyyətə əsaslanır.

Naxçıvan Muxtar Respublikası Atletika Federasiyasının 2021-ci ilin yekunu və 2022-ci ildə görüləcək işlərə dair hesabat yığıncağı keçirilib. Atletika Federasiyasının sədri Rəhman Məmmədov və Gənclər və İdman naziri Ramil Hacılı çıxış etmiş, Naxçıvan Muxtar Respublikası Atletika Federasiyasının 2021-ci ilə dair hesabatı dinlənilmiş, qazanılan nailiyyətlər, ölkə və beynəlxalq səviyyəli yarışlarda əldə olunan yüksək nəticələr barədə məlumat verilmişdir. Yığıncaqda 2022-ci ildə Federasiyanın fəaliyyətinin daha da inkişaf etdirilməsi, həmçinin komandaların tərkibinin gücləndirilməsi ilə bağlı tapşırıqlar verilmiş, 2022-ci ilin tədbirlər planı təsdiq edilmişdir.

Yekunda səmərəli fəaliyyəti ilə fərqlənən federasiyanın bölmə rəhbərləri, məşqçi-müəllimlər və  bir qrup idmançı təşəkkürnamə, fəxri fərman və hədiyyələrlə mükafatlandırılıb.